Н.Орунтаев Таластагы жаңы сейил бактын курулуш иштерин текшерди
Курулуш, архитектура жана турак жай-коммуналдык чарба министри Нурдан Орунтаев Талас облусуна болгон иш сапарынын алкагында Талас шаарында курулуп жаткан жаңы борбордук аллеянын курулушу менен таанышты.
Министрликтен билдиргендей, долбоор шаарды көрктөндүрүүгө жана тургундар үчүн заманбап эс алуу шарттарын түзүүгө багытталган. Учурда курулуш иштери белгиленген графикке ылайык активдүү жүрүүдө.
Долбоорго ылайык, аллеяда эс алуу зоналары, соода түйүндөрү, гүлдөрдүн галереялары, отургучтар жана жөө жүрүүчүлөр үчүн ыңгайлуу жолдор каралган. Ошондой эле эне жана бала үчүн атайын бөлмөлөр уюштурулат.
Мындан тышкары, аймакты жарыктандыруу, жашылдандыруу жана көрктөндүрүү иштери комплекстүү түрдө жүргүзүлөт. Объект пайдаланууга берилгенден кийин шаар тургундары жана коноктору үчүн заманбап коомдук мейкиндик түзүлөт.
