Ош шаарында 1200 орундуу заманбап мектеп курулуп жатат
Ош шаарында Салижан Жигитов атындагы 1200 орундуу мектептин курулушу жүрүп жатат. Долбоор мамлекеттик бюджеттин эсебинен ишке ашырылып, учурда курулуш иштери кызуу жүрүүдө. Бул тууралуу Курулуш министрлигинен билдиришти.
Башкы планга ылайык, мектеп 5 блоктон турган 4 кабаттуу имарат болуп салынат. Жалпы аянты 13 610 чарчы метрди түзөт. Анда заманбап окуу класстары, лабораториялар, китепкана, ашкана, эмгек класстары, дарыгердин бөлмөсү, компьютердик класс, жыйындар залы жана бардык шарттары менен спорт залы каралган. Мындан сырткары, мектептин айланасында футбол, волейбол жана баскетбол үчүн атайын аянтчалар курулуп, көрктөндүрүү иштери жүргүзүлөт.
Учурда иштеп жаткан мектеп 1964-жылы курулуп, эскилиги жеткен. Бүгүнкү күндө анда 2000ге жакын окуучу билим алып, орун жетишсиздиги жаралууда.
Эске салсак, бул мектептин курулушун баштоого өлкө башчы Садыр Жапаров өзү катышып, мезгил кутучасын салган.
