Өндүрүш жанданып жатат: Быйыл кайсы ишканалар ачылат?
Суу ресурстары, айыл чарба жана кайра иштетүү өнөр жайы министринин орун басары Рустам Балтабаевдин төрагалыгы алдында быйылкы жылы ачылышы пландалган өнөр жай ишканаларынын өкүлдөрү менен жумушчу жолугушуу өткөрүлдү.
Ведомствонун маалыматына ылайык, жолугушуунун жүрүшүндө долбоорлордун ишке ашырылышынын учурдагы абалы талкууланып, өндүрүштүк аянттарды даярдоо, инфраструктура менен камсыз кылуу, ошондой эле мамлекеттик колдоо чаралары каралды. Мындан тышкары, ишканаларды өз убагында ишке киргизүү боюнча негизги маселелерге өзгөчө көңүл бурулду.
Маалымат үчүн, "100 өнөр жай ишканасы – 2026" долбоору Министрлер Кабинетинин Төрагасы А.А. Касымалиевдин 2026-жылдын 19-февралындагы тапшырмасынын негизинде бекитилген.
Аталган долбоордун алкагында быйыл бир катар өндүрүш ишканаларын ишке киргизүү пландалууда. Алардын катарында сүт азыктарын өндүрүүчү "Обидфайз" ЖЧКсы, кондитердик продукция чыгарган "Барбол" фабрикасы, мөмө-жемиштерди кайра иштетүүчү цех, ошондой эле мрамор жана акиташты кайра иштетүүчү "Эко Стоун" ишканасы бар. Мындан тышкары, нан жана ун азыктарын өндүрүүчү ишканалар, тери иштетүүчү завод, канаттуулар фабрикалары жана тоют өндүрүүчү ишканалар да ишке киргизилет.
Жаңы долбоорлордун ишке ашырылышы жүздөгөн жаңы жумуш орундарын түзүүгө, агроөнөр жай секторун өнүктүрүүгө жана өлкө экономикасына инвестицияларды тартууга өбөлгө түзөт.
Жолугушуунун жыйынтыгында тиешелүү мамлекеттик органдар менен өз ара аракеттенүүнү күчөтүү, долбоорлорду ишке ашырууну тездетүү жана ишканаларды белгиленген мөөнөттө пайдаланууга берүү боюнча конкреттүү тапшырмалар берилди.
Министрлик мындан ары да агроөнөр жай секторун колдоо жана экономикалык өсүштү камсыз кылууга багытталган иштерди улантат.
