Бишкектин четиндеги эс алуучу аймактар ИИМ өкүлдөрү тарабынан тыкыр көзөмөлгө алынууда
Май майрамдарынын күндөрүндө Бишкек шаарынын ИИББнын милициянын кайгуул-күзөт кызматынын өкүлдөрү шаар тургундары көп эс алган жайларда коомдук тартипти жана жарандардын коопсуздугун камсыз кылышууда.
Бишкек шаарынын ИИББнын Басма сөз кызматынын маалыматына караганда, күн жылышы менен борбор калаанын тургундары жаратылышта көбүрөөк убакыт өткөрүп, парктарга, жашыл аймактарга жана суу жээктерине барып эс алышууда. Андыктан укук бузууларды алдын алуу жана мүмкүн болгон окуяларга ыкчам чара көрүү максатында, милиция кызматкерлери автоунаа жетпеген, жетүүгө кыйын болгон аймактарда да кайгуул күзөт жүргүзүшүүдө.
Өзгөчө көңүл калк арасында алдын алуу жана түшүндүрүү иштерине бурулууда. Милиция кызматкерлери эс алуучулар, анын ичинде балдар жана алардын ата-энелери менен маектешип, коопсуз жүрүм-турум эрежелерин түшүндүрүп жатышат. Ошондой эле жарандарга тазалыкты сактоо жана айлана-чөйрөгө аяр мамиле кылуу зарылдыгы эскертилүүдө.
