Эрлист Акунбеков “Джунда” заводундагы модернизация иштери менен таанышты
Суу ресурстары, айыл чарба жана кайра иштетүү өнөр жайы министри Эрлист Акунбеков Кара-Балта шаарындагы “Джунда” Чайна Петроль Компани” жабык акционердик коомуна таандык мунайды кайра иштетүүчү заводуна барып, модернизациялоо иштеринин жүрүшү менен таанышып көчмө жыйын өткөрдү. Бул тууралуу Өкмөттүн Басма сөз кызматынан билдиришти.
Отурумга тиешелүү мамлекеттик органдардын башчылары, заводдун жетекчилиги жана кызматкерлери катышты.
Жыйында ички рынокту күйүүчү-майлоочу май менен камсыздоо максатында иш алып барууну көздөгөн заводдун учурдагы маселелери каралды.
МинКаб Төрагасынын орун басары Эрлист Акунбеков жетектеген тиешелүү мамлекеттик органдардын өкүлдөрү заводдун модернизациялоо иштеринин учурдагы этабы жана өндүрүш объектилеринин даярдык деңгээли менен таанышышты. Ошондой эле, бул заводдо индустриалдык паркты куруу боюнча инвестициялык долбоордун ишке ашырылышы боюнча маалымдалды.
Анда бул долбоордун өлкөнүн өнөр жайын өнүктүрүүдөгү, мунайды кайра иштетүүнү жогорулатуудагы жана жаңы жумуш орундарын түзүүдөгү маанилүүлүгү белгиленди.
Жыйындын соңунда тиешелүү мамлекеттик органдардын жана заводдун маалыматтары угулуп, талкуулангандан кийин бир катар тийиштүү тапшырмалар берилди. Модернизациялоо иштери быйыл бүткөрүлөөрү пландалууда.
