“Көгүлтүр Ысык-Көл” санаторийинде жаңы корпус ачылды

Президент Садыр Жапаров 7-майда Ысык-Көл облусунун Чолпон-Ата шаарындагы “Көгүлтүр Ысык-Көл” санаторийинин 60 жылдык мааракесине жана жаңы корпусунун ачылышына катышты.

Мамлекет башчысы 97 орундуу жаңы үч кабаттуу имарат менен таанышып, жаңыланган инфраструктураны, анын ичинде бассейн жана термалдык булактарды көрүп чыкты. Ошондой эле бак отургузду.

Салтанаттуу бөлүктө сүйлөгөн сөзүндө Президент туризм жана санаторий-курорт тармагын өнүктүрүү өлкө үчүн маанилүү багыт экенин белгиледи. Анын айтымында, акыркы жылдары бул тармакта инфраструктура жаңыланып, кызмат көрсөтүүнүн сапаты жакшырды.

Садыр Жапаров “Ысык-Ата”, “Жети-Өгүз” санаторийлеринде, “Жыргалаң” курортунда жана “Улан” борборунда жүргүзүлгөн иштерди мисал келтирди. Ал эми “Көгүлтүр Ысык-Көл” санаторийинде капиталдык оңдоо иштери жүргүзүлүп, жаңы объектилер курулганын айтты. Жаңы корпус акыркы 40 жыл ичинде биринчи жолу салынып жатканы белгиленди.

Президент акыркы эки жылда санаторийдин таза кирешеси эки эседен ашык өскөнүн жана кызматкерлердин айлык маянасы жогорулаганын билдирди.

Ошондой эле Мамлекет башчысы Президенттин Иш башкармалыгынын ишмердүүлүгүнө байланыштуу айтылган сын-пикирлерге жооп берип, бардык иштер мыйзам чегинде жана көзөмөл алдында жүргүзүлүп жатканын айтты.

Садыр Жапаров акыркы жылдары жүргүзүлгөн реформалар, анын ичинде “Кумтөрдү” мамлекетке кайтаруу, транспорт жана темир жол тармагындагы өзгөрүүлөр тууралуу да токтолду.

Сөзүнүн соңунда Президент санаторийдин жамаатын маараке жана жаңы корпустун ачылышы менен куттуктап, ийгиликтерди каалады.

Иш-чара майрамдык концерт менен жыйынтыкталды.