Жыргалаңда “Ала-Тоо Резорт” долбоорунун жүрүшү талкууланды
Жыргалаң айылында “Ала-Тоо Резорт” бардык сезондогу тоо-кластери мамлекеттик долбоорун ишке ашыруу маселелери боюнча көчмө жыйын өттү. Жыйын Президенттин Администрациясынын Жетекчисинин орун басары Азамат Кадыралиевдин төрагалыгы астында уюштурулду. Бул тууралуу Айыл чарба министрлигинен билдиришти.
Иш-чарага суу ресурстары, айыл чарба жана кайра иштетүү өнөр жайы министринин орун басары Рустам Балтабаев, министрликтин кызматкерлери жана ведомстволук мекемелердин өкүлдөрү катышты.
Көчмө жыйындын жүрүшүндө долбоордун ишке ашырылуу этаптары, курулуш иштеринин жүрүшү жана инженердик инфраструктура объектилери каралды. Анын ичинде ичүүчү суу менен камсыздоо, саркынды сууларды чыгаруу жана тазалоочу курулмалар системалары боюнча аткарылып жаткан иштер менен таанышуу болду.
Ошондой эле автомобиль жолдорун куруу, электр менен камсыздоо, долбоордук-сметалык документация жана сервистик инфраструктура маселелери талкууланды.
Жыйындын жыйынтыгында тиешелүү мамлекеттик органдарга жана жооптуу түзүмдөргө долбоорду ишке ашырууну тездетүү жана белгиленген мөөнөттөрдү көзөмөлдөө боюнча тапшырмалар берилди.
Иш сапардын алкагында катышуучулар курорттун инфраструктурасы жана объекттеги курулуш иштеринин жүрүшү менен да таанышышты.
