Ошто №4 мектеп-гимназиясына кошумча окуу имараты курулат
Күн мурун Ош шаарындагы №4 С.М. Киров атындагы мектеп-гимназиясы үчүн 200 орундуу кошумча окуу имаратынын курулушуна капсула салуу аземи болуп өттү.
Мэриядан билдиришкендей, иш-чарага Ош шаарынын мэри Жанарбек Акаев, шаардык кеңештин депутаттары, билим берүү тармагынын өкүлдөрү, мугалимдер жана ата-энелер катышты.
Жаңы окуу корпусу окуучулар үчүн заманбап шарттарды түзүүгө жана мектептеги орун жетишсиздигин азайтууга багытталган. Имаратта билим алууга ыңгайлуу бардык шарттар каралат.
Азыркы учурда Ош шаарында билим берүү тармагында ири курулуш иштери жүргүзүлүүдө. Жалпысынан шаар боюнча 17 мектептин курулушу башталган.
Ош шаарынын мэри Жанарбек Акаев бул көрүнүштү тарыхый учур катары баалап, шаарда заманбап мектептер, бала бакчалар жана социалдык объекттер курулуп жатканын белгиледи.
Ошондой эле быйыл шаарда жалпысынан 12 социалдык объект пайдаланууга берилери маалымдалды. Алардын катарына бала бакчалар, спорт залдар, жаштар борборлору жана башка мекемелер кирет.
