Баткен облусундагы сел 20,8 млн сомдук зыян келтирди
Президенттин Баткен облусундагы ыйгарым укуктуу өкүлү Мамыржан Рахимовдун жетекчилигинде Баткен облусунун Жарандык коргонуу кызматтарынын отуруму өттү.
Өкүлчүлүктөн билдиришкендей, жыйында 30-апрелден 5-майга чейин катуу жааган жаандын кесепетинен Лейлек, Баткен, Кадамжай райондорунда жана Кызыл-Кыя шаарында катталган сел кырсыктарынын кесепеттерин жоюу боюнча жүргүзүлгөн иштер каралды.
Ошондой эле күтүлүп жаткан сел коркунучтарынын алдын алуу, адам өмүрүн сактоо жана материалдык чыгымдарды азайтуу маселелери талкууланды. Тиешелүү кызматтарга күч жана каражаттарды даярдыкта кармоо, ыкчам аракеттерди уюштуруу боюнча тапшырмалар берилди.
Маалыматка ылайык, селдин кесепетинен облус боюнча жалпы чыгым 20 млн 800 миң сомду түздү.
Жабыркаган турак үйлөр селден толугу менен тазаланып, залалсыздандыруу иштери аяктаган. Убактылуу коопсуз аймактарга көчүрүлгөн тургундар үйлөрүнө кайтарылып, турак жайы жараксыз абалга келген эки үй-бүлө убактылуу турак жайларга жайгаштырылды.
