Бишкектеги жаңы Ош базарынын курулушу качан бүтөрү белгилүү болду
Бүгүн Президент Садыр Жапаров Бишкек шаарындагы жаңы Ош базарынын курулушунун жүрүшү менен таанышты. Бул тууралуу Президенттин Администрациясынын маалымат кызматы билдирди.
Маалыматка ылайык, жаңы соода-базар комплекси борбор калаадагы ири инфраструктуралык долбоорлордун бири болуп саналат. Объекттин жалпы аянты 155 миң чарчы метрди түзүп, эки кабаттан жана бир жер алдындагы деңгээлден турат.
Долбоор боюнча жалпысынан 10 миңден ашуун соода орду каралган. Соода жайлары багыттарына жараша бөлүштүрүлүп, сатуучулар жана кардарлар үчүн ыңгайлуу шарттар түзүлөт.
Ошондой эле комплексте кампалар, унаа токтотуучу жайлар жана жылдын бардык мезгилинде соода жүргүзүүгө ылайыкташкан заманбап инфраструктура каралган.
Президент курулуш иштеринин сапатына өзгөчө көңүл бурууну тапшырды. Жаңы Ош базарынын курулушу ушул жылдын август айына чейин толук аяктайт деп пландалууда.
Маалыматта белгиленгендей, учурдагы Ош базары жаңы комплекс толук бүткөндөн кийин гана көчүрүлөт. Ал эми бошогон аймакта заманбап жашыл эс алуу зонасы уюштурулат.
Мындан тышкары, жаңы автобекет жана Ош базары пайдаланууга берилген соң коомдук транспорт каттамдары да кайра каралып чыгат.
