Кочкордо 3 кабаттуу жаңы оорукана курулуп жатат
Курулуш министрлиги тарабынан Кочкор районунда 3 кабаттуу, эки корпустан турган оорукана курулууда. Долбоор республикалык бюджеттин эсебинен каржыланып, ишке ашырылууда. Бул тууралуу ведомстводон билдиришти.
Башкы планга ылайык, оорукана заманбап үлгүдө салынып, жалпы аянты 6661 чарчы метрди түзөт. Анда 40ка жакын бейтап палатасы, дарыгерлердин бөлмөлөрү, төрөт бөлүмү, операциялык блок, биохимиялык лаборатория, реанимация бөлүмү, стерилдөө бөлмөсү, жыйындар залы жана ашкана каралган. Ошондой эле имаратка лифт орнотулат.
Курулуш-монтаждоо иштери “Кыргызкурулуш” мамлекеттик ишканасы тарабынан жүргүзүлүп, учурда иштер кызуу жүрүп жатат.
Долбоорду ишке ашыруу аймактын инфратүзүмүн жакшыртууга жана калкты заманбап медициналык кызмат менен камсыздоого багытталган.
