Кызыл-Кыядагы элдик жолугушууда 50дөн ашык маселе көтөрүлдү

Президент Садыр Жапаровдун тапшырмасынын негизинде 11-майда Баткен облусунун башчысы Мамыржан Рахимов Кызыл-Кыя шаарынын тургундары менен жолугушуу өткөрдү.

Өкүлчүлүктөн билдиришкендей, жолугушууга 300гө жакын тургун катышып, 50дөн ашуун суроо-талап жана кайрылуулар айтылды.

Жарандар негизинен турак жай үчүн жер тилкеси, таза суу, мунапыс маселеси, аз камсыз болгон үй-бүлөлөрдүн социалдык абалы, каттоого туруу, жаңы жумуш орундарын түзүү, шаар инфраструктурасын өнүктүрүү жана жеке укуктук маселелер боюнча суроолорун беришти.

Көтөрүлгөн айрым маселелер жеринде чечилип, тиешелүү мамлекеттик органдардын жетекчилерине конкреттүү тапшырмалар берилди. Ал эми кошумча убакыт талап кылган кайрылуулар көзөмөлгө алынды.

Жыйынга облустук мекеме-ишканалардын жетекчилери жана жергиликтүү бийлик өкүлдөрү да катышып, жарандардын суроолоруна жооп беришти.

Маалыматка ылайык, мындай жолугушуулар графиктин негизинде Баткен облусунун бардык район-шаарларында улантылат.

Жолугушуу УТРК Баткен телеканалы аркылуу түз эфирде көрсөтүлдү.