Өзгөндөгү мал базарда мониторинг: миңден ашык мал текшерүүдөн өттү

Ветеринардык жана фитосанитардык көзөмөл кызматы тарабынан Ош облусунун Өзгөн районунда жайгашкан "Прогресс" мал базарында мониторинг жүргүзүлдү. Бул тууралуу Айыл чарба министрлигинен билдиришти.

Маалыматка ылайык, учурда аталган мал базарына күн сайын орто эсеп менен 520га жакын бодо мал, 320 жылкы жана 900гө чукул кой-эчки алып келинет.

Мониторингдин жүрүшүндө базарга жеткирилген мал жандыктарынын болжол менен 70%ы кулак биркалары менен камсыздалганы аныкталды.

Ошондой эле, мал жандыктарын коштоочу ветеринардык документтер текшерилип, төмөнкү көрсөткүчтөр белгилүү болду:

• Форма №1 (Ф1) коштоочу документи менен келген малдар — 40%;
• Электрондук форматтагы ветеринардык коштоочу документтер менен келгендер — 10%.

Адистердин айтымында, "Прогресс" мал базарына мал жандыктары негизинен Ош облусунун Алай, Чоң-Алай жана Кара-Кулжа райондорунан, ошондой эле Жалал-Абад жана Талас облустарынан жеткирилет.