Алайда 20 миң тонна балык өстүрүлүүдө
12-майда Алай районунун Согунду айылы аймагындагы “Алай Тейит” балык чарбасында Ветеринардык жана фитосанитардык көзөмөл кызматынын Ош шаары жана Ош облусу боюнча региондук башкармалыгынын инспекторлору тарабынан мониторинг жүргүзүлдү. Бул тууралуу аталган кызматтан билдиришти.
Маалыматка ылайык, мониторингдин жүрүшүндө балык чарбасына форель балыгынын икралары Дания, Испания жана Турция мамлекеттеринен алынып келери аныкталды. Жылына 500 миң даана икра өндүрүлөт. Ал эми балыктын жеми Европа өлкөлөрүнөн жана Иран Ислам Республикасынан ташылып келет.
Учурда чарбада орточо салмагы 1 килограммдан 3 килограммга чейинки болжол менен 20 миң тонна форель балыгы өстүрүлүүдө. Өндүрүлгөн продукция ички рынокто, анын ичинде район аймагында жана коңшу райондордо сатылууда. Азырынча экспортко чыгарыла элек.
Ошондой эле ветеринардык кызматтын ички реестрине киргизүү боюнча тиешелүү документтер такталып, жеке ишкердин күбөлүгү, жерге болгон мамлекеттик актысы жана башка документтери каралууда.
