360 киши ажылык сапарга кетти
15-майда, Бишкектеги “Манас” эл аралык аба майданынан Сауд Арабиясынын Жидда шаарына 360 киши ажылык сапарга кетти. Бул тууралуу мусулмандар дин башкармалыгынан билдиришти.
Бул — 2026-жылдагы Бишкек — Жидда багыты боюнча алгачкы каттам. Буга чейин, 10-майда ажылардын биринчи тобу Ош — Медина багыты аркылуу Ош шаарынан сапарга чыккан.
Быйыл жалпы 6 миң 60 кыргызстандык ыйык жерлерге зыярат кылат.
Ажыларды узатууга Дин иштери жана этностор аралык мамилелер боюнча улуттук агенттиктин төрагасы Талантбек Ташибеков, муфтий Абдулазиз Закиров жана муфтияттын кызматкерлери катышты. Алар ажыларга ак жол каалап, ажылыктары кабыл болушун тилеп, дуба кылышты.
