Бишкектин Лущихин көчөсүндө жол кыймылы убактылуу жабылат
2026-жылдын титулдук тизмесине ылайык, Лущихин көчөсүнүн Л.Толстой көчөсүнөн Лущихин көчөсүнө чейинки 600 метр аралыктагы бөлүгүндө капиталдык оңдоо иштерин жүргүзүү каралган. Бул тууралуу Бишкек шаардык мэриясынын басма сөз кызматы билдирди.
Маалыматка карганда, долбоордун алкагында жолдун эски катмары жаңыланып, тиешелүү инфраструктуралык элементтерди оңдоо жана иретке келтирүү иштери аткарылат. Аталган объект боюнча подряддык уюм болуп “СУ-4 Кара-Балта” ЖЧКсы аныкталган.
Учурда капиталдык оңдоо иштерине байланыштуу көчөнүн аталган бөлүгүндө жол кыймылына убактылуу чектөө киргизилди. Бул чара курулуш иштерин сапаттуу жана коопсуз жүргүзүү максатында кабыл алынууда.
Муниципалитет шаар тургундарын жана айдоочуларды алдын ала каттамдарын пландап алууга чакырат жана убактылуу жаралган ыңгайсыздыктарга түшүнүү менен мамиле кылууну өтүнөт.
