Бишкекке 20 миң орундуу ипподром курулат
Бишкек шаардык мэриясы жана “НКЗ” ЖЧКсы кызматташуу жана өз ара түшүнүү тууралуу меморандумга кол коюшту. Бул тууралуу мэриядан билдиришти.
Маалыматка ылайык, меморандумдун алкагында борбор калаада эл аралык ипподром куруу долбоорун ишке ашыруу боюнча өнөктөштүк мамилелерди өнүктүрүү жана бекемдөө каралган.
Долбоор боюнча 20 миңге чейин көрүүчүнү батыра алган заманбап ипподром комплекси курулат. Анда эл аралык стандарттагы кум жана чөп жолдору, ошондой эле заманбап түнкү жарыктандыруу системасы болот.
Мындан тышкары, аткана комплекси жана аукциондук зал, соода жана эс алуу аймактары курулуп, көк бөрү жана башка улуттук ат оюндары үчүн атайын арена даярдалат.
Белгиленгендей, объекттин долбоорлоо иштери улуттук спорт түрлөрү боюнча федерациялар менен биргеликте жүргүзүлүүдө.
