Кадамжайда 265 миллион сомго мектеп курулууда
Баткен облусунун Кадамжай районундагы Ак-Кыя айылында 375 орундуу заманбап мектеп курулууда. Бул тууралуу Курулуш министрлигинин басма сөз кызматы билдирди.
Маалыматка ылайык, объекттин курулушу үстүбүздөгү жылдын февраль айында башталган. Каржылоо республикалык бюджеттен каралып, наркы 265 миллион сомду түзөт. Учурда пайдубалын куюу иштери аяктап калды.
Долбоор боюнча мектептин жалпы аянты 3377 чарчы метрди түзүп, үч кабаттуу окуу корпусу, жыйындар залы жана бардык шарттары менен спорт залы каралган. Жаңы мектеп пайдаланууга берилсе, эки мөөнөт менен 750 окуучунун заманбап шартта билим алуусуна мүмкүнчүлүк түзүлөт.
Курулуштун ар бир этабы көзөмөлдөнүп, иштер “Кыргызкурулуш” мамлекеттик ишканасы тарабынан жүргүзүлүүдө.
