Бишкектеги Ч.Айтматов проспектисиндеги көпүрө оңдолот
Бишкектеги Ч.Айтматов проспектиси менен Л.Толстой көчөлөрүнүн кесилишиндеги эстакадалык көпүрөдө оңдоо иштери 2026-жылдын 16-майында башталды. Бул тууралуу мэриянын басма сөз кызматы билдирди.
Маалыматка караганда, оңдоо иштерине байланыштуу Ч.Айтматов проспектисинен Л.Толстой көчөсүнө чейинки, ошондой эле Л.Толстой көчөсүнөн Ч.Айтматов проспектисине чейинки кесилиш убактылуу жабылат.
Мындан тышкары, Ч.Айтматов проспектисиндеги курулуш иштери жүрүп жаткан жерлерде асфальт төшөө иштерине байланыштуу эстакадалык көпүрөнүн эки тарабына убактылуу тосмолор орнотулат.
Жол кыймылына чектөөлөр 2026-жылдын 15-июлуна чейин күчүндө болот.
Ишке эскирген конструкцияларды демонтаждоо, анын ичинде каптамаларды алып салуу, тротуарларды оңдоо, аянтты тазалоо жана курулуш таштандыларын чыгаруу кирет. Фасаддарды жаңылоодо заманбап жана декоративдик материалдар колдонулат. Ошондой эле, тротуарды калыбына келтирүү пландаштырылууда.
Жумуштардын өзүнчө топтомуна коммуналдык инфраструктураны жаңыртуу, анын ичинде жаңы кабелдик линияларды тартуу, жарыктандыруу жабдууларын алмаштыруу жана энергияны үнөмдөөчү LED лампаларын орнотуу кирет. Акыркы этапта темир тосмолор орнотулат.
