1-июндан тарта жол эрежесин бузгандар автоматтык түрдө аныкталат
2026-жылдын 1-июнунан тартып республика боюнча жол эрежелерин бузуу фактыларын аныктоочу жаңы автоматташтырылган комплекстер ишке кирет. Бул тууралуу ЖКККББнын басма сөз кызматы билдирди.
Маалыматка ылайык, Ички иштер министрлигинин Жол кыймылынын коопсуздугун камсыздоо башкы башкармалыгы тарабынан жол кыймылынын эрежелерин бузуу фактыларын автоматтык түрдө аныктоочу программалык-аппараттык комплекс тааныштырылды.
Аталган комплекс Президенттин Иш башкармалыгына караштуу “Кызмат” мамлекеттик мекемеси тарабынан иштелип чыгып, пайдаланууга ИИМдин Жол кыймылынын коопсуздугун камсыздоо башкы башкармалыгынын алдындагы Техникалык багыттагы борбору мамлекеттик ишканасына өткөрүлүп берилди.
Бул комплекс Кыргызстандын аймагында ийгиликтүү сыноодон өткөрүлүп, төмөнкү жол эрежелерин бузуу фактыларын автоматтык түрдө аныктайт:
белгиленген ылдамдыкты ашыруу;
коопсуздук курун тагынбоо;
унаа башкарып бара жатып уюлдук телефон колдонуу;
каршы тилкеге чыгуу.
2026-жылдын 1-июнунан тартып аталган программалык-аппараттык комплекстер республика боюнча толук кандуу иш режиминде иштей баштайт.
Заманбап технологияларды колдонуу айдоочулардын жоопкерчилигин жогорулатууга, жол кырсыктарын азайтууга жана жарандардын өмүрүн жана ден соолугун сактоого багытталган.
