Кыргызстанда бүгүн - Энелер күнү: өлкөдө 3,7 млн ашык аял жашайт
Кыргызстанда жыл сайын май айынын үчүнчү жекшембисинде Энелер күнү катары 2012-жылдан бери Кыргыз Республикасынын Президентинин Жарлыгына ылайык, расмий түрдө белгиленип келет.
Улуттук статистика комитетинин маалыматына ылайык, 2026-жылдын 1-январына карата Кыргызстанда 3 млн 740 миң аял кишилер жашайт. Бул өлкөнүн жалпы калкынын 50,5 %ын түзөт. Алардын ичинен: 1 млн 635 миңден ашууну шаарларда, 2 млн 105 миңге жакыны айыл жерлеринде жашайт.
2025-жылы өлкөдө 140,5 миңден ашуун аял эне аталды. Статистика боюнча, кыргызстандык аялдар биринчи баласын орто эсеп менен 23–24 жашында төрөшөт жана өмүрүндө орточо үч балалуу болушат.
Адистер белгилегендей, Кыргызстан КМШ өлкөлөрүнүн арасында калктын табигый өсүшү сакталып калган мамлекеттердин бири бойдон калууда. Башкача айтканда, өлкөдө төрөлүү көрсөткүчү калктын көбөйүшүн камсыз кылууда.
2025-жылы эгиз төрөлгөн учурлар көбөйгөн. Өткөн жылы республикада 1311 эгиз төрөлсө, 2024-жылы бул көрсөткүч 1253 болгон. Ал эми үч эм төрөлгөн учурлар азайып, 13тү түзгөн. Бир жыл мурда 21 үч эм төрөлгөн.
Саламаттык сактоо министрлигинин маалыматына ылайык, төрөттөрдүн 33 %га жакыны эки жылдан аз аралык менен катталган. Ал эми үч жыл жана андан көп аралыктагы төрөттөрдүн үлүшү 44 %ды түзөт. Дарыгерлердин айтымында, төрөттөрдүн ортосундагы кыска аралык аялдардын ден соолугуна терс таасирин тийгизип, аз кандуулук жана кош бойлуулуктагы оорчулуктарды жаратышы мүмкүн.
Адистер белгилегендей, Кыргызстанда 2000-жылдардан тарта төрөт көрсөткүчү өсүп, эң жогорку чекке 2019-жылы жеткен. 2020-жылдан бери төрөлгөндөрдүн саны бир аз азайганы менен, өлкөдө калктын өсүшү үчүн жетиштүү деңгээл сакталып калууда.
