“Акыркы коңгуроо” салтанатында акча чогултууга тыюу салынат
Агартуу министрлиги билим берүү уюмдарында өткөрүлүүчү “Акыркы коңгуроо”салтанатына бүтүрүүчүлөрдөн, ата-энелерден жана мыйзамдуу өкүлдөрдөн акча каражаттарын чогултууга тыюу салат. Бул тууралуу аталган министрликтин басма сөз кызматы билдирди.
Министрликтин маалымдашынча, бул талаптар коррупциялык көрүнүштөрдүн алдын алуу, ата-энелерге кошумча материалдык басым көрсөтүүгө жол бербөө жана билим берүү чөйрөсүндө ачык-айкындуулукту камсыз кылуу максатында киргизилген.
Агартуу министрлигинин буйругуна ылайык:
“Акыркы коңгуроо” салтанатын өткөрүү үчүн акча чогултуу;
мугалимдерге же мектеп администрациясына белек алуу үчүн каражат чогултуу;
мектептен тышкаркы иш-чараларды уюштуруу;
ата-энелерге материалдык басым көрсөтүү мыйзамсыз болуп эсептелет.
Агартуу министрлиги мектеп жетекчилерин, мугалимдерди жана ата-энелерди мыйзам талаптарын так сактоого чакырат. “Акыркы коңгуроо” майрамы коопсуз жана ашыкча чыгымсыз өткөрүлүшү керектигин министрлик маалымдайт.
