Амантур Турсуниязов: Жетим-Тоо кенин иштетүү үчүн инвестор изделүүдө
Жогорку Кеңештин жыйынында депутат Кубанычбек Самаков учурда Нарын районундагы Жетим-Тоо кенинде кандай иштер жүргүзүлүп жатканын сурады.
К.Самаков геологиялык чалгындоо иштерине лицензия 2023-жылы эле берилгенин эске салды.
Депутат Кумтөрдөн кийинки эң чоң кен байлыгы Жетим-Тоодо экенин жана бул жерди иштетүү боюнча кандай пландар бар экенин сурады.
Жаратылыш ресурстары, экология жана техникалык көзөмөл министринин орун басары Амантур Турсуниязовдун маалыматына караганда, учурда инвестор изделип жатат.
"Учурда потенциалдуу инвесторлорду карап жатабыз. Долбоорлоо иштери дагы жүрүп жатат. Учурда жеринде геологиялык чалгындоо иштери баштала элек", – деп түшүндүрдү ал.
Кыргыз геологиялык кызматынын директорунун орун басары Руслан Калиловдун айтымында, долбоорлоо иштерин мамлекет өзү жүргүзүп жатат.
