Тамчы айылындагы курулуш объекттерине айып пул салынды
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматы тарабынан Ысык-Көл районунун Тамчы айылындагы бир катар курулуш объекттерине пландан сырткары текшерүү жүргүзүлдү. Бул тууралуу аталган министрликтин басма сөз кызматы билдирди.
Маалыматка ылайык, текшерүүнүн жүрүшүндө Ысык-Көлдүн суу фондусунун жерлерине мыйзамсыз түрдө топурак жана кум төгүлгөндүгү, ошондой эле экологиялык мыйзамдардын талаптары толук сакталбагандыгы аныкталды.
Аталган фактылар боюнча тиешелүү чаралар көрүлүп, административдик айыптар салынды. Мындан тышкары, айлана-чөйрөгө келтирилген зыян үчүн жалпы суммасы 5 566 590 сом өлчөмүндө компенсациялык төлөмдөр эсептелди.
Ошондой эле мыйзам бузууларды жоюу, мамлекеттик экологиялык экспертизанын талаптарын аткаруу жана уруксат берүүчү документтерди толук тариздөө боюнча милдеттүү көрсөтмөлөр берилди.
Министрлик тарабынан экологиялык мыйзамдардын аткарылышын көзөмөлдөө иштери мындан ары да улантылат.
Маалымат үчүн:
– “Авангард Резорт” ЖЧКсына — 1 925 237 сом;
– “КыргызИнвестСтрой” ЖЧКсына — 1 929 562 сом;
– “Елизавета” ЖЧКсына - 1 711 791 сом өлчөмүндө компенсациялык төлөмдөр эсептелди.
