Климаттык ишмердүүлүк жөнүндө мыйзамдын долбоору кабыл алынды
Бүгүн, Жогорку Кеңештин жыйынында “Климаттык ишмердүүлүк жөнүндө” мыйзам долбоору каралып, экинчи жана үчүнчү окууда кабыл алынды.
Мыйзам долбоорун Агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин төрагасынын орун басары Алишер Козуев тааныштырды.
Анын айтымында, бир катар сунуштарды, Минкабдын корутундусун эске алуу менен мыйзам добоору кыйла жакшыртылып, кайрадан жазылып чыкты. Ага жаңы беренелер киргизилди жана каржылык багыттар боюнча жөнгө салынуучу ченемдер такталып берилди.
Документ климаттык ишмердүүлүк чөйрөсүндөгү коомдук мамилелерди жөнгө салууга жана климаттын өзгөрүшүнүн КРнын калкына, экономикасына жана экосистемаларына тийгизген таасирин минималдаштыруу үчүн климаттык аракеттердин укуктук негиздерин аныктоого багытталган.
Мындан тышкары жыйында “Кыргыз Республикасындагы табигый монополиялар жөнүндө” Кыргыз Республикасынын Мыйзамына өзгөртүүлөрдү киргизүү тууралуу” мыйзамдын долбоору экинчи окууда каралып, кабыл алынды.
