Чет элдик жарандардын мыйзамсыз миграциясын уюштурган коррупциялык схема ачыкталды
УКМК тарабынан чет өлкөлүк жарандар үчүн жасалма медициналык маалымкаттарды колдонуу аркылуу мыйзамсыз миграция каналын уюштуруунун кезектеги фактысы ачыкка чыкты. Бул тууралуу УКМКнын басма сөз кызматы билдирди.
Маалыматка ылайык, жасалма медициналык маалымкаттарды колдонгон чет элдик жарандардын мыйзамсыз миграциясына каршы күрөшүү боюнча көрүлгөн чараларга карабастан, УКМК тарабынан дагы бир кезектеги факт ачыкталды.
20-майда жүргүзүлгөн ыкчам-издөө иш-чараларынын жыйынтыгында УКМК кызматкерлери тарабынан чет мамлекеттин Л.Ц. аттуу жараны кармалды. Ал Кыргызстанда айрым жарандары жана Бишкек шаарынын үй-бүлөлүк медицина борборунун кызматкерлери менен сүйлөшүп алып, жасалма медициналык маалымкаттарды колдонуу аркылуу чет өлкөлүк жарандардын мыйзамсыз миграциясынын каналын уюштурган.
Тактап айтканда, Л.Ц.нын иштеген жеринде жүргүзүлгөн тинтүү учурунда чет өлкөлүк жарандарга Кыргызстандын аймагында жүрүүгө укук берүүчү визаларды тариздөө жана узартуу үчүн колдонулган 90дон ашык даяр медициналык маалымкаттар табылып, алынды.
УКМК Кыргызстандын жарандарын жана чет өлкөлүк жарандарды терс кесепеттерге жол бербөө максатында Кыргызстандын мыйзамдарын талаптарын так сактоого чакырат.
Эске салсак, чет өлкөлүк жарандардын мыйзамсыз миграциясын уюштургандыгы үчүн Кыргыз Республикасынын Кылмыш-жаза кодексинин 168-беренесине ылайык кылмыш жоопкерчилиги каралган.
Аталган берене боюнча 3 жылдан 8 жылга чейин эркинен ажыратуу, белгилүү кызматтарды ээлөө же белгилүү бир ишмердүүлүк менен алектенүү укугун 3 жылга чейин чектөө, ошондой эле мүлкүн конфискациялоо түрүндөгү жаза каралат.
Учурда Л.Ц. КР УКМКнын убактылуу кармоочу жайына камалды.
