Кыргызстан менен Россия баңгизат кылмыштарына каршы кызматташууну күчөтүүнү талкуулашты
Кыргыз Республикасынын Ички иштер министрлигинин министринин орун басары Нурбек Абдиев Россия Федерациясынын Ички иштер министрлигинин Баңгизаттардын мыйзамсыз жүгүртүлүшүн көзөмөлдөө боюнча башкы башкармалыгынын жетекчиси Иван Горбунов менен жолугушуу өткөрдү.
ИИМдин басма сөз кызматы билдиргендей, жолугушууда баңгизат каражаттарынын, психотроптук заттардын жана алардын прекурсорлорунун мыйзамсыз жүгүртүлүшүнө каршы күрөшүү жаатындагы эки тараптуу кызматташтык маселелери талкууланды. Тараптар ошондой эле трансулуттук баңги кылмыштуулугуна каршы аракеттенүү боюнча өз ара кызматташууну чыңдоо багытында пикир алмашышты.
Жолугушуунун жүрүшүндө Нурбек Абдиев кыргыз-россиялык кызматташтыктын жогорку деңгээлин белгилеп, эки өлкөнүн Шанхай кызматташтык уюму жана башка эл аралык аянтчалардагы биргелешкен ишмердүүлүгүнүн маанилүүлүгүн баса белгиледи.
Тараптар заманбап баңги коркунучтарына каршы натыйжалуу күрөшүү үчүн кызматташууну мындан ары дагы бекемдөө зарылдыгын белгилешти.
Жолугушуунун жыйынтыгында Кыргызстан менен Россиянын өкүлдөрү өнөктөштүктү кеңейтүүгө, тажрыйба алмашууга жана учурдагы коркунучтарга биргелешип каршы турууга даяр экендиктерин ырасташты.
