Таласта мыйзамсыз курулган объектилер аныкталды
Курулуш, архитектура жана турак жай-коммуналдык чарба министрилигине караштуу Мамлекеттик архитектура-курулуш контролдоо департаментинин Талас регионалдык башкармалыгы тарабынан аймактагы курулуш обьектилериндеги мыйзам талаптарынын сакталышы туруктуу негизде көзөмөлдөнүүдө. Бул тууралуу аталган министрликтин басма сөз кызматы билдирди.
Маалыматка ылайык, текшерүү иштеринин алкагында Талас шаарындагы “Элим” конок үйү жана “Майрам апа” дүкөнү уруксат документтери жок курулуп, иштетилип жаткандыгы маалым болду.
Тактап айтканда, тиешелүү архитектуралык-уруксат берүүчү документтерисиз ишмердүүлүгүн жүргүзүп жатканы аныкталган. Бул өз кезегинде Кыргыз Республикасынын “Шаар куруу жана архитектура жөнүндө” мыйзамынын талаптарын одоно бузуу болуп эсептелет.
Белгилей кетсек, буга чейин аталган обьектилерге аныкталган мыйзам бузууларды жоюу туралуу эскертүү берилгенине карабастан, талаптар аткарылган эмес. Натыйжада жаран Т.Г.М. жана И.Р.Ш. карата айып пул салынып, административдик чаралар көрүлдү. Ошондой эле документтештирүү иштери боюнча кошумча түшүндүрүү иштери жүргүзүлдү.
Мамлекеттик архитектура-курулуш контролдоо департаменти жарандарды жана курулуш субьекттерин курулуш иштерин баштоодо баардык уруксат берүүчү документтерди өз убагында алуу жана мыйзам талаптарын так сактоо зарылдыгын эскертет.
