Дары-дармек бааларын жөнгө салуу, сапатын көзөмөлдөө мүмкүн болуп калды
Кыргыз Республикасынын Саламаттык сактоо министрлиги бааларды жөнгө салуу жана препараттардын баалары жөнүндө маалымдуулукту жогорулатуу механизмдери аркылуу калк үчүн сапаттуу, коопсуз жана натыйжалуу дары-дармектердин жеткиликтүүлүгүн жакшыртуу боюнча иштерди улантып жатканын билдирди.
Министрликтин маалыматына ылайык, учурда жашоо үчүн маанилүү дары каражаттарынын тизмесине кирген препараттардын баалары мамлекет тарабынан жөнгө салынат.
Бирок айрым категориядагы дары-дармектер бул тартипке кирбейт. Алардын катарына: психотроптук жана баңгизат препараттары; баасы 100 сомго чейинки жана жеңилдетилген дары-дармек программаларына кирбеген каражаттар; рецептсиз сатылуучу айрым дары-дармектер; Кыргызфармация аркылуу алып келинген препараттар кирет.
Министрлик жарандардын дары-дармек тууралуу маалымдуулугун жогорулатуу максатында жаңыланган «Дары-Дармек» мобилдик тиркемесин пайдаланууну сунуштады.
Тиркеме аркылуу жарандар: дарынын өлкөдө катталган-катталбаганын жана анын расмий баасын текшере алышат; керектүү препарат сатылган жакынкы дарыканаларды таба алышат; жеңилдетилген рецепт боюнча арзандатуу каралган-карылбаганын көрө алышат; ашыкча баа коюлган учурлар боюнча түздөн-түз арыз жөнөтө алышат.
Министрлик жарандарды мобилдик тиркемени колдонуу аркылуу, дары-дармектер тууралуу так жана ишенимдүү маалыматты колдонууга чакырып, «Дары-Дармек» тиркемесин жүктөп алууну сунуштады.
