Министрлик карылар үйүнөн чыгарылган жаран тууралуу түшүндүрмө берди
Кыргыз Республикасынын Эмгек, социалдык камсыздоо жана миграция министрлиги активист Руслан Шеринбеков тарабынан айтылган Нижне-Серафимовкадагы стационардык мекемеде кары адамдар белгисиз себептер менен чыгарылып жатат деген маалымат чындыкка дал келбестигин билдирди.
Министрликтин маалыматына ылайык, сөз болуп жаткан жаран И.С. 1961-жылы төрөлгөн жана 2024–2026-жылдары Нижне-Серафимовкадагы карылар үчүн стационардык мекемеде мамлекеттик камсыздоодо социалдык кызматтарды алып келген.
Расмий маалыматта белгиленгендей, Кыргыз Республикасынын Өкмөтүнүн 2013-жылдын 17-майындагы №273 токтому менен бекитилген социалдык стандарттарга ылайык, ички тартип эрежелерин системалуу түрдө — үч жана андан көп жолу бузган жарандар стационардык мекемеден чыгарылууга тийиш. Ал эми И.С. аттуу жаран мекеменин ички эрежелерин бир нече жолу бузган. Тактап айтканда, карылар үйүндөгү жашоо тартибин сактабаган, медициналык кызматкерлерге асылган жана кол көтөргөн учурлар катталган. Ушуга байланыштуу ал мекемеден өз арызынын негизинде чыгарылган.
Мындан тышкары, министрлик пенсия маселесине да түшүндүрмө берди. Билдирүүгө караганда, “Мамлекеттик жөлөкпулдар жөнүндө” мыйзамга ылайык, пенсия алуу укугу жок жарандарга, анын ичинде эркектерге 65 жаштан, аялдарга 60 жаштан тартып 2000 сом өлчөмүндө жөлөк пул дайындалат. Ал эми И.С. аттуу жаран 2026-жылдын июль айында гана 65 жашка толот.
Ушуга байланыштуу министрлик коомчулукту такталган жана ишенимдүү маалыматтарга гана ишенүүнү чакырды.
Эске салсак, И.С атту жаран Президенттин Чүй областындагы ыйгарым укуктуу өкулү менен жолугушууда, Нижне-Серафимовкадагы стационардык мекемеде иштеген адистер кесипкөй эместигин, мамлекет тарабынан бөлүнүүчү жөлөк пулдар пенсионерге берилбей жаткандыгын жана аны мекемеден мыйзамсыз чыгарып салышкандыгын айтып, арызданган.
