Бишкекте Президент Садыр Жапаровдун катышуусунда Курман айт намазы окулду
Бишкектеги Турдакун Усубалиев атындагы аянтта Президент Садыр Жапаров баштаган миңдеген мусулман адамдарынын катышуусунда Айт намаз окулду.
Курман айтка жарандар таңкы саат 5:00дөн баштап чогулуп, саат 06:30дан тартып дин кызматкерлери Куран аяттарын окуп, жамаатка Курман айт майрамынын мааниси тууралуу кеңири баяндап беришти.
Кийинчерээк аянтка Президент Садыр Жапаров, баштаган мамлекеттик кызматтын бир топ өкүлдөрү да келип, Курман айт намазына катышышты. Борбордогу майрамдык Айт намазы болжол менен саат 07:50дө жыйынтыкталды.
Аянттын айланасы милиция кызматкерлери жана Мамлекеттик күзөт кызматы тарабынан көзөмөлгө алынды. ИИМдин маалыматына ылайык, өлкө боюнча ушул күнү коомдук тартипти көзөмөлгө алуу үчун, жалпысынан 10 миңге жакын кызматкер тартылды.
