Бишкек мэринин жергиликтүү тургундар менен жолугушуулары аяктады
КРнын Президентинин тапшырмасына ылайык, Бишкек шаарынын мэри Айбек Джунушалиевдин борбор калаанын райондорунун тургундары менен жолугушуулары жыйынтыкталды.
Акыркы жолугушуулар 25-26-майда Октябрь районунун тургундары менен өткөрүлдү. Эки күндүн ичинде мэр 850дөн ашык шаар тургуну менен жолугушту. Ушул сыяктуу жолугушуулар Свердлов, Биринчи Май жана Ленин райондорунда өткөрүлгөн.
Шаар башчысынын басма сөз кызматынын маалыматына ылайык, үч райондогу жолугушууларда борбор калаанын болжол менен 2500 тургуну кабыл алынып, 882 тургундан 1400 кайрылуу келип түшкөн. Учурда алардын болжол менен 400ү аткарууга алынды. Кайрылуулардын көпчүлүгү жолдорду жана тротуарларды куруу жана оңдоо, ошондой эле канализация жана суу менен камсыздоо тармактарын орнотуу маселелерине тиешелүү болгон.
Жолугушуулар 5 сааттан 8 саатка чейин уланып, мэр шаардык кызматтардын жана муниципалдык ишканалардын жетекчилерине жарандардын кайрылууларын тез арада карап чыгууну жана жолугушуулардын жүрүшүндө түздөн-түз көрүлгөн чаралар жөнүндө отчет берүүнү тапшырды.
