Улуттук статистика: Кыргызстандыктардын көбү жүрөк-кан тамыр ооруларынан каза болууда
Улуттук статистика комитети үстүбүздөгү жылдын алгачкы үч айында өлкөдө 8 миң адамдын өлүмү катталганын билдирди.
Маалыматка ылайык, кыргызстандыктардын көбү жүрөк-кан тамыр ооруларынан каза болууда. Бул бардык өлүм учурларынын 54 %ын түзгөн. Экинчи орунда шишик оорулары, андан кийин жол кырсыгы, уулануу, суицид жана адам өлтүрүү сыяктуу тышкы себептер турат.
Расмий маалыматта январь-март айларында өлкөдө 68 суицид жана 11 адам өлтүрүү фактысы катталганы дагы айтылды.
Дарыгерлер жүрөк оорулары жашарып жатканын эскертип, өзгөчө 30-60 жаштагы жарандар арасында эрте өлүм көбөйүп жатканын белгилешүүдө.
