Бишкектеги 16 кабаттуу турак жайдын курулушунда мыйзам бузуулар аныкталды
Бишкек шаарындагы Абдымомунов көчөсү, 299 дарегинде курулуп жаткан 16 кабаттуу турак жай объектинде курулуш ченемдеринин талаптары сакталбаганы белгилүү болгон. Бул тууралуу Курулуш, архитектура жана турак жай-коммуналдык чарба министрлигинен билдиришти.
Атап айтканда, курулуш аянтчасы талаптагыдай иретке келтирилбегени, автордук көзөмөл журналы жүргүзүлбөгөнү, түндүк тарабындагы жылуулоо жана гидроизоляция иштеринин долбоордук документацияга ылайык келбегени аныкталган. Ошондой эле объекттин түштүк-чыгыш тарабындагы котловандын бекемделиши камсыздалбаганы белгиленген.
Департаменттин маалыматына ылайык, бул фактылар курулуш ченемдеринин жана эрежелеринин талаптарын одоно бузуу болуп эсептелет.
Натыйжада курулуш иштерин жүргүзүп жаткан "НБК Курулуш" жоопкерчилиги чектелген коомуна акт түзүлүп, аныкталган мыйзам бузууларды жоюу үчүн үч күндүк мөөнөт берилди.
Мамлекеттик архитектура-курулуш контролдоо департаменти курулуш иштерин жүргүзгөн бардык субъекттерди мыйзам талаптарын так сактоого чакырып, курулуш ченемдерин бузуу мыйзам чегинде жоопкерчиликке алып келерин эскертти.
