Финансы министрлигинде антикоррупциялык саясат боюнча кеңешме өттү
Бүгүн Финансы министрлигинде коррупциянын алдын алуу жана ага каршы аракеттенүү маселелерине арналган кеңешме болуп өттү. Иш-чарага министрликтин кызматкерлери жана Башкы прокуратуранын өкүлдөрү катышты.
Ведомствонун маалыматына ылайык, кеңешмени ачкан Финансы министри Руслан Сүйналиев мыйзамдуулукту сактоо, ачык-айкындуулук жана ак ниеттүүлүк мамлекеттик органдын натыйжалуу ишмердүүлүгүнүн негизги принциптери экенин белгиледи. Ошондой эле ал коррупциянын алдын алуу ар бир кызматкердин жоопкерчилигин жана активдүү катышуусун талап кыларын айтты.
Жыйындын жүрүшүндө мамлекеттик антикоррупциялык саясатты ишке ашыруунун актуалдуу маселелери, коррупциялык тобокелдиктердин алдын алуу механизмдерин өркүндөтүү жана бул багыттагы мекемелер аралык кызматташтыкты күчөтүү маселелери талкууланды.
Башкы прокуратуранын Коррупцияга каршы аракеттенүү башкы башкармалыгынын өкүлү Нурсултан Ташыбек уулу коррупциянын алдын алуу боюнча иштерди мындан ары да күчөтүүнүн жана жамаатта коррупциянын бардык көрүнүштөрүнө карата чыдамсыз мамилени калыптандыруунун маанилүүлүгүн белгиледи.
Кеңешменин жыйынтыгында кызматкерлерге коррупцияга каршы иш-чараларды ишке ашырууга активдүү катышуу, ошондой эле документтерди жана чечимдерди кароодо коррупциялык тобокелдиктерди алдын ала аныктоо боюнча тыгыз кызматташуу сунушталды.
