Борбор Азия өлкөлөрү жашыл экономика маселелерин талкуулашты
Самаркандда өтүп жаткан Глобалдык экологиялык фонддун 8-Ассамблеясынын алкагында Борбор Азия өлкөлөрү ак илбирсти жана тоо экосистемаларын сактоо боюнча кызматташтыкты тереңдетүүгө даяр экенин билдиришти.
Жыйынга Кыргызстан, Казакстан, Тажикстан, Түркмөнстан жана Өзбекстандын өкүлдөрү, ошондой эле Глобалдык экологиялык фонд, БУУнун Өнүктүрүү программасы жана эл аралык өнөктөш уюмдардын өкүлдөрү катышты.
Талкуунун жүрүшүндө ГЭФ-9 программасынын алкагында ак илбирсти жана башка жапайы жаныбарларды сактоо, тоо экосистемаларын коргоо, экологиялык коопсуздукту камсыз кылуу жана жаратылыш ресурстарын туруктуу пайдалануу маселелери каралды.
Жаратылыш ресурстары, экология жана техникалык көзөмөл министри Акыл Токтобаев Кыргызстан ак илбирсти жана анын жашоо чөйрөсүн сактоо боюнча эл аралык демилгелерде активдүү роль ойноп келе жатканын белгиледи.
Анын айтымында, өлкө өзгөчө корголуучу жаратылыш аймактарын кеңейтүүгө, жапайы жаратылышка мониторинг жүргүзүүнүн заманбап технологияларын киргизүүгө жана жергиликтүү жамааттарды жаратылышты коргоо иштерине тартууга өзгөчө көңүл бурууда.
Жыйындын жыйынтыгында Борбор Азия өлкөлөрү биологиялык ар түрдүүлүктү сактоо жана тоо экосистемаларынын туруктуулугун жогорулатуу боюнча кызматташтыкты күчөтүүгө кызыкдар экенин билдирген документке кол коюшту.
