Кара-Сууда мектеп, ооруканалар жана жол долбоорлору көзөмөлдөндү
5-июнда Жогорку Кеңештин төрагасы Марлен Маматалиев баштаган эл өкүлдөрү Ош облусунун Кара-Суу районуна барып, билим берүү, саламаттык сактоо, ирригация жана жол тармагындагы бир катар социалдык объектилердин курулушу жана оңдолуп-түзөлүшү менен таанышты.
Маалыматка ылайык, иш сапардын алкагында Зарбдар айылындагы №69 Чыңгыз Айтматов атындагы мектептин капиталдык оңдоо иштери каралды. 137 млн сомдук долбоор Дүйнөлүк банктын колдоосу менен ишке ашырылып жатат.
Ошондой эле 55 жыл мурда курулган Нариман аймактык ооруканасынын ордуна 200 млн сомдук жаңы оорукана куруу пландалып жатканы маалымдалды.
Мындан тышкары, Ош – Кара-Суу жолунун реконструкциясы, Зарбдар айылындагы ички жолдор жана Отуз-Адыр каналын жаңылоо долбоорунун жүрүшү талкууланды. Жалпы баасы 1,7 млрд сомдон ашкан ирригациялык долбоор аяктагандан кийин 13 миң гектардан ашуун жер сугат суу менен камсыз болот деп күтүлүүдө.
Ошондой эле райондогу эски жана үч нөөмөттүү мектептердин абалы көтөрүлүп, жаңы билим берүү мекемелерин куруу зарылдыгы белгиленди.
Жумушчу сапардын соңунда жергиликтүү тургундар менен жолугушуу өтүп, жол, таза суу, жер маселеси жана социалдык инфраструктура боюнча көйгөйлөр айтылды.
с
