Кимдер дары-дармекти арзандатылган баада ала алышат?
Кыргызстанда милдеттүү медициналык камсыздандыруу (ММК) системасында камсыздандырылган жарандар үчүн дары-дармек менен жеңилдетилген камсыздоо программасы иштейт. Бул программа аркылуу айрым дары-дармектерди дарыгердин рецепти менен арзандатылган баада сатып алууга болот. Бул тууралуу Саламаттыкты сактоо министрлигинен маалымдашты.
Билдирүүгө караганда, жеңилдиктен пайдалана ала турган жарандардын катарына пенсионерлер, 18 жашка чейинки балдар, күндүзгү бөлүмдө 21 жашка чейин окуган студенттер, социалдык жөлөк пул алуучулар, расмий иштеген жарандар, ММК полисин өз алдынча сатып алгандар, расмий катталган жумушсуздар жана аскер кызматкерлери кирет.
Жеңилдетилген рецептти алуу тартиби
Жеңилдетилген рецепт алуу үчүн жаран Үй-бүлөлүк дарыгерлер тобуна катталган болушу керек. Эгер медициналык көрсөтмөлөр болсо, дарыгер ММКнын Кошумча программасына кирген дары-дармекке электрондук рецепт жазып, анын номерин берет.
Дарыканадан дары алуу үчүн рецепттин номерин жана ID-картадагы 14 орундуу жеке идентификациялык номерди (ПИН) көрсөтүү жетиштүү. Дары сатылган учурда фармацевт кассалык чек берүүгө жана дарыны колдонуу тартибин түшүндүрүүгө милдеттүү.
Жарандар жеңилдетилген рецепттерди тейлеген каалаган дарыканага кайрыла алышат. Мындай дарыканаларда Милдеттүү медициналык камсыздандыруу фонду менен кызматташуу тууралуу маалымат жана жеңилдетилген негизде берилүүчү дары-дармектердин тизмеси жайгаштырылат.
Кошумча суроолор жаралса, жарандар Милдеттүү медициналык камсыздандыруу фондунун 113 ишеним телефонуна кайрылып, жазылган рецепттер, төлөнгөн каражаттар жана мамлекет тарабынан төлөнгөн компенсациялар тууралуу маалымат ала алышат.
