Ат-Башынын жайлоолоруна кар жаап, малчыларга чөп жеткириле баштады
Нарын облусунун Ат-Башы районундагы бийик тоолуу жайлоолорго кар жаап, айрым аймактарда кардын калыңдыгы 20 сантиметрге чейин жетти. Бул тууралуу Өзгөчө кырдаалдар министрлигинен билдиришти.
Маалыматка ылайык, өзгөчө Арпа өрөөнүндө калың кар түшүп, жайлоодогу малчылардын ишине кыйынчылык жаралган. Айрым маалыматтар боюнча, аба ырайынын кескин өзгөрүшүнөн улам мал арасында жоготуулар да каттала баштаган.
Учурда Ат-Башы райондук мамлекеттик администрациясынын тапшырмасы менен жайлоодогу малчыларга жем-чөп жеткирүү иштери уюштурулуп жатат. Тиешелүү кызматтар жеринде иш алып барып, кырдаалга мониторинг жүргүзүүдө.
ӨКМ билдиргендей, абал көзөмөлдө турат жана зарыл болгон учурда кошумча жардам көрсөтүү чаралары көрүлөт.
Синоптиктер тоолуу аймактарда туруксуз аба ырайы дагы бир нече күнгө созулушу мүмкүн экенин эскертип, малчыларды сак болууга чакырышууда.
