Адал-индустриянын талаптарын бузгандарга айып пул салынат
Президент Садыр Жапаров «Укук бузуулар жөнүндө кодекске өзгөртүүлөрдү киргизүү тууралуу» мыйзамга кол койду.
Жаңы мыйзамга ылайык, адал өндүрүмдөрдү жана адал кызматтарды өндүрүү, сактоо, ташуу, сертификаттоо жана жүгүртүү боюнча талаптарды бузгандарга административдик жоопкерчилик киргизилди.
Ага ылайык, жеке жактарга 7 500 сом, юридикалык жактарга 23 миң сом айып пул каралган. Ал эми шайкештикти тастыктоо жол-жоболорун бузган компанияларга 65 миң сомго чейин айып салынат.
Мыйзам боюнча адал өндүрүмдөр бирдиктүү «Адал» белгиси менен маркировкаланышы керек. Көзөмөл мамлекеттик портал жана мобилдик тиркеме аркылуу QR-код менен жүргүзүлөт.
Жаңы талаптар адал-индустриядагы ачык-айкындуулукту күчөтүүгө жана керектөөчүлөрдүн ишенимин жогорулатууга багытталган.
