Баткенде баңгизат ташуу аракетине бөгөт коюлду
Баткен облусунда ири өлчөмдөгү баңги каражаттарын мыйзамсыз ташууга бөгөт коюлду. Бул тууралуу Ички иштер министрлигинин басма сөз кызматы билдирди.
Маалыматка ылайык, Тажикстандан Өзбекстанга Баткен облусу аркылуу баңгизат ташып жүргөн уюшкан топтун ишмердүүлүгү тууралуу кабар түшкөн.
КР Кылмыш-жаза кодексинин 282-беренеси боюнча козголгон кылмыш ишинин алкагында Кадамжай районунда Hyundai Sonata унаасы токтотулуп, айдоочу кармалган. Тинтүү учурунда унаанын ичинен өзгөчө жыты бар зат салынган 10 таңгак табылган.
Соттук-химиялык экспертизанын жыйынтыгында табылган зат гашиш экени аныкталып, анын жалпы салмагы 9 килограмм 908 граммды түзгөн.
Кармалган жаран Баткен районунун 1987-жылы туулган тургуну экени белгилүү болду. Учурда тергөө иштери уланууда.
