Өлкөдө Кызыл китепти жаңыртууга 21 млн сом бөлүнөт
Жаратылыш ресурстары, экология жана техникалык көзөмөл министрлиги Улуттук илимдер академиясы менен биргеликте Кыргызстандын Кызыл китебин жаңыртуу боюнча ири илимий долбоорду баштады.
Министрликтин маалыматына ылайык, макулдашуунун алкагында окумуштуулар өлкөнүн бардык аймактарында комплекстүү талаа жана камералдык изилдөөлөрдү жүргүзүшөт.
Илимий иштердин негизги максаты — флора жана фаунанын сейрек кездешүүчү жана жоголуп кетүү коркунучунда турган түрлөрү тууралуу так жана орчундуу маалыматтарды топтоо.
Долбоор 24 айга эсептелип, аны ишке ашырууга жалпы 21 миллион сомго жакын каражат каралган.
Эки жылдык изилдөөлөрдүн жыйынтыгында адистер министрликке Кызыл китептин жаңы басылышына негиз боло турган илимий материалдарды даярдап беришет.
Учурда өлкөнүн Кызыл китебине жоголуп бара жаткан жана жоголуу коркунучунда турган жаныбарлар менен өсүмдүктөрдүн ондогон түрлөрү киргизилген. Алардын катарында 57 түрдүү куш, 23 түрдүү сүт эмүүчү, 8 түрдүү сойлоочу, 7 түрдүү балык, 18 түрдүү муундуу буттуу, ошондой эле 89 түрдүү жогорку өсүмдүк жана козу карын бар.
