Ак-Жар конушун жарык менен камсыздоо боюнча кеңешме өттү
Жогорку Кеңеште Бишкек шаарынын Свердлов районундагы Ак-Жар конушун туруктуу жарык менен камсыздоо маселеси боюнча кеңейтилген кеңешме өттү.
Жогорку кеңештин басма сөз кызматы берген маалыматка ылайык, аталган жыйын Улукбек Карыбек уулунун демилгеси менен уюштурулган.
Кеңешменин негизги максаты — Ак-Жар конушундагы жарык тартыштыгын жоюу жана «Дордой» подстанциясынан 6 кВ жаңы кабелдик линияны куруу иштерин ыкчамдатуу болду.
Иш-чарага Бишкек мэриясынын, Бишкек электр тармактар ишканасынын, Бишкек шаар куруу жана архитектура башкы башкармалыгынын, Свердлов райондук администрациясынын жана «Электросила» ЖЧКсынын жетекчилери катышты.
Жыйынтыгында тиешелүү жактарга инженердик-техникалык документтерди кыска мөөнөттө бүтүрүү жана курулуш иштеринин так “жол картасын” иштеп чыгуу боюнча тапшырмалар берилди.
