Бишкектеги №88 мектептин жаңы окуу корпусунун курулушу уланууда
Бишкектин Көк-Жар конушундагы №88 жалпы билим берүү мектебине кошумча 500 орундуу жаңы окуу корпусунун курулушу уланууда. Бул тууралуу Курулуш, архитектура жана турак жай-коммуналдык чарба министрлигинен билдиришти.
Долбоорго ылайык, жаңы корпус заманбап талаптарга жооп берген үч кабаттуу мектеп имараты болуп, бардык зарыл шарттар менен камсыздалат. Объекттин жалпы аянты 5525 чарчы метрди түзөт.
Учурда имараттын экинчи кабатынын колонналарын тургузуу иштери аяктап, курулуштун кийинки баскычы башталды.
Маалыматка ылайык, президент Садыр Жапаров тарабынан берилген тапшырманын негизинде республикалык бюджеттин эсебинен Бишкек шаарында 20 жаңы мектептин курулушу ыкчам жүргүзүлүүдө.
