Эсептөө палатасы: 21 млрд сомдон ашык каржылык мыйзам бузуу аныкталды
Жогорку Кеңештин 10-июндагы жыйынында Эсептөө палатасынын 2025-жылдагы иши тууралуу отчёт каралды.
Жыйында баяндама жасаган Эсептөө палатасынын төрагасы Алмазбек Акматов 2025-жылы 98 аудитордук иш-чара жүргүзүлгөнүн билдирди.
Анын айтымында, текшерүүлөрдүн жыйынтыгында 21 млрд 419 млн сомдук финансылык мыйзам бузуу аныкталган.
Учурда анын 13 млрд 406 млн сому өндүрүлүп, калыбына келтирилгени маалымдалды.
Талкуу маалында депутаттар электрондук аудитке өтүү, мамлекеттик органдардагы финансылык тартип, мыйзам бузуулар үчүн жоопкерчилик жана бюджеттик каражаттардын натыйжалуу пайдаланылышы боюнча маселелерди көтөрүштү.
Эл өкүлү Махабат Мавлянова айрым министрликтерде кызматкерлерге ашыкча айлык төлөнгөн фактылар аныкталганын айтып, анын көлөмү 200 млн сомдон 450 млн сомго чейин жеткенин белгиледи.
Ал эми депутат Нилуфар Алимжанова «Кыргызфармация» мамлекеттик ишканасынын ишмердүүлүгүнө көңүл буруп, онкологиялык ооруларга чалдыккан балдар үчүн дары-дармектер өз убагында алынбай калган учурлар болгонун билдирди.
Жыйындын жүрүшүндө мамлекеттик органдардын ишин санариптештирүү, тендердик иштердин ачык-айкындуулугу жана мыйзам бузууларга жол берген жетекчилердин жоопкерчилиги тууралуу маселелер дагы талкууланды.
