Ошто мамлекеттик-жеке өнөктөштүк долбоорлору кеңейүүдө
Инвестициялар боюнча улуттук агенттиктин башчысы Равшанбек Сабиров Ош шаарындагы мамлекеттик-жеке өнөктөштүк негизинде ишке ашырылып жаткан бир катар мекемелерге барды.
Маалыматка ылайык, аталган иштер инвестициялык долбоорлордун ишке ашырылышына мониторинг жүргүзүүнүн алкагында жүргүзүлүп жатат.
Иш сапарынын жүрүшүндө ал мамлекеттик-жеке өнөктөштүк алкагында курулуп жаткан Ош облустук юстиция башкармалыгынын жаңы имаратынын курулушу менен таанышты. Долбоор беш кабаттуу заманбап административдик имаратты курууну карайт.
Маалыматка ылайык, долбоордун мамлекеттик өнөктөшү Юстиция министрлиги болсо, жеке өнөктөшү — «Капитал Строй Инвест» ЖЧКсы. Жалпы инвестициянын көлөмү 228 млн сомду түзөт. Объектти пайдаланууга берүү 2026-жылга пландалган.
Ошондой эле Равшанбек Сабиров «Дельфин» балдар-өспүрүмдөр спорт мектебинин базасында түзүлгөн «Булак» спорттук-саламаттыкты чыңдоо комплексине барды.
Долбоор Ош калаасынын мэриясы жана «Дем-Ал» ден соолукту чыңдоо комплекси» ЖЧКсы тарабынан мамлекеттик-жеке өнөктөштүк негизинде ишке ашырылган. Ага 95 млн сом инвестиция тартылып, спорттук комплекс 2025-жылдын 5-октябрында пайдаланууга берилген.
Сапардын жыйынтыгында мамлекеттик-жеке өнөктөштүк механизмдерин өнүктүрүү, инвестиция тартуу жана аймактык инфраструктураны жакшыртуу маселелери талкууланды.
