Социалдык жардам ортомчуларсыз берилет, шылуундарга ишенбеңиз
Эмгек, социалдык камсыздоо жана миграция министрлиги социалдык контракт алуу иштерине байланыштуу алдамчылык схемалары аныкталганын билдирди.
Маалыматка ылайык, Баткен облусунун аралык аймактык эмгек, социалдык камсыздоо жана миграция башкармалыгы тарабынан жүргүзүлгөн мониторинг учурунда белгисиз адамдар «социалдык контракт алууга жардам берүү» шылтоосу менен жарандардан акча талап кылганы аныкталган.
Министрлик дароо укук коргоо органдарына кайрылып, жүргүзүлгөн ыкчам-издөө иш-чараларынын жыйынтыгында шектүү кармалган жана кылмыш иши козголгон.
Социалдык контракттар мыйзамга ылайык министрликтин аймактык бөлүмдөрү аркылуу гана таризделет. Каражаттар түздөн-түз алуучулардын банктык эсебине которулуп, ортомчуларсыз жана кошумча төлөмдөрсүз берилет.
Министрлик жарандарды сак болууга чакырып, социалдык жардам алуу үчүн акча талап кылгандар тууралуу дароо тиешелүү органдарга билдирүүнү өтүндү.
