Улуттук банк: шылуундар жаңы ыкма колдонууда
Улуттук банк жарандардын акчасын алдап алуунун жаңы шылуундук ыкмасы пайда болгонун эскертти.
Маалыматка ылайык, шылуундар өздөрүн Улуттук банктын кызматкери катары тааныштырып, социалдык тармактар жана мессенжерлер аркылуу жарандарга билдирүү жөнөтүп жатышат. Алар Улуттук банктын логотиби түшүрүлгөн жасалма документтерди көрсөтүшөт.
Шылуундар жарандарга Түндүк системасында бузулуу болгонун, жеке маалыматтар үчүнчү жактарга өтүп кеткенин жана алардын атына насыя алынганын айтып, коркутуу ыкмасын колдонушууда.
Андан соң “акчаны сактоо” шылтоосу менен каражаттарды “коопсуз эсепке” которууну сунушташат. Улуттук банк мындай билдирүүлөргө ишенбөөгө жана бейтааныш адамдарга акча жөнөтпөөгө чакырды.
Мекеме белгилегендей, мындай билдирүүлөр толугу менен шылуундар тарабынан жөнөтүлөт.
Ошондой эле жарандарга банк эсептерин, сыр сөздөрүн эч кимге бербөө сунушталды.
Шектүү билдирүүлөр түшкөн учурда сүйлөшүүнү токтотуп, банкка же укук коргоо органдарына кайрылуу керектиги эскертилди.
