Жапайы жаныбарларды аткан жаранга 212 миң сом айып салынды
Кемин районунун тоолуу аймагында жапайы жаныбарларга мыйзамсыз мергенчилик кылган Чүй облусунун тургуну кармалды. Бул тууралуу Жаратылыш ресурстары, экология жана техникалык көзөмөл министрлиги маалымдады.
Текшерүү учурунда эки баш каман, бир баш элик, эки баш кыргоол жана бир баш кекилик атылганы аныкталган.
Кармалган жаран Кемин РИИБне жеткирилип, жаратылышка келтирген зыяны үчүн 212 миң сом айып салынган. Ал айып пулду өз ыктыяры менен төлөп бергени маалымдалды.
Ошондой эле мыйзамсыз колдонулган аңчылык куралы милицияга өткөрүлүп берилип, жаран 3 жылга мергенчилик кылуу укугунан ажыратылды.
