БАЭден Бишкек жана Ошко авиакаттамдар кайра ачылат
Бириккен Араб Эмираттарынын "Air Arabia" авиакомпаниясы Бишкек жана Ош шаарларына үзгүлтүксүз авиакаттамдарды кайрадан аткара баштайт.
Бул боюнча "Кыргызстан аэропорттору" ААКтын башкармалыгынын төрагасы Манасбек Самидинов менен Бириккен Араб Эмираттарынын делегациясынын жумушчу жолугушуусунда макулдашылды.
Маалыматка ылайык, Шаржа — Ош — Шаржа багыты боюнча каттамдар 22-июндан тартып жанданат. Ал эми Шаржа — Бишкек — Шаржа багыты боюнча каттамдарды 2026-жылдын 3-июлунан тарта кайрадан аткаруу пландалууда.
"Кыргызстан аэропорттору" ААКтан билдиришкендей, авиакаттамдардын кайра жандандырылышы өлкөнүн транспорттук жеткиликтүүлүгүн кеңейтүүгө, Кыргызстан менен Бириккен Араб Эмираттарынын ортосундагы кызматташтыкты бекемдөөгө жана туристтер, ишкерлер, өнөктөштөр үчүн жаңы мүмкүнчүлүктөрдү түзүүгө шарт түзөт.
Жолугушуунун жүрүшүндө тараптар авиация тармагындагы кызматташууну мындан ары өнүктүрүү маселелерин да талкуулашты. Анда жаңы багыттарды ачуу, эки өлкөнүн ортосундагы туристтик, экономикалык жана ишкердик байланыштарды кеңейтүү боюнча сунуштар каралды.
Белгилей кетсек, "Air Arabia" авиакомпаниясынын Кыргызстанга болгон каттамдары мартта АКШ, Израил жана Ирандын ортосундагы чыңалууга байланыштуу убактылуу токтотулган болчу. Эми авиакомпания өз каттамдарын кайрадан калыбына келтирип жатат.
